Sejarah Ringkas ni Toga Naipospos

Ia Toga Naipospos ima anak siampudan ni Ompunta Tuan Sorbadibanua (Nai Suanon)... Di pat ni dolok Imun do huta ni ompunta Toga Naipospos, mandompakhon wilayah Silindung manundalhon wilayah Humbang... Marpinompar ma Toga Naipospos, ia anakna siahaan Toga Marbun, jala siampudan Toga Sipoholon.

Marpinompar muse do Toga Marbun tingki di dolok Imun, ima: 

1. Lumban Batu (Siahaan)

2. Banjarnahor (Sibitonga)

3. Lumban Gaol (Siampudan)

Jala marpinompar do Toga Sipoholon tong di huta i, ima:

1. Sibagarian

2. Hutauruk

3. Simanungkalit

4. Situmeang

Dipaborhat Toga Naipospos ma Toga Marbun dohot angka pahompuna dibagasan partonggoan tu tano sihadaoan, ala ibana anak siahaan sipajaeon, ima tu Bakkara di topi ni tao Toba, jala diboan do:

- Boni ni eme 6 (onom) tapongan

- Pinggan pasu na bidang

- Piso halasan marsuhul tanduk ni Belu

- Parhalaan

- Hujur palait dohot Sumbia

- Hudon na marlangkop

- Abal-abal

- Mas saparongguan

- Ogung sabangunan

- Dera

- Taoar Pangabang-abang, taoar pangubung-ubung, sipangolu na mate, siparata naung busuk

- Pagar

- Ula-ula Tonun

- Horbo sapasang

- Sipatulpak

Sahat ma Toga Marbun dohot anakna 3 (tolu) i tu Bakkara, jala adong do 2 (dua) boruna, sada mai marhamulion tu marga Nai Ambaton (Siallagan) di Ambarita Pulo Samosir, jala na sada nari mangihuthon pandok ni natua-tua muli dompak Barus...

Diingani Toga Marbun ma rura Bakkara, laos adong do dua Homban (Mual Pusakko) di si, ima: Homban Julu dohot Homban Solotan. Molo binereng parpeak ni homban on, na sada marhapeahan do i di daerah bariba ni  Aek Si Lang ima Homban Julu, na sada nari manjonokhon topi ni Tao Toba. Suraon do Marbun parjolo masuk tu Bakkara asa marga-marga na asing i. Ndang mungkin boi pauli Pusaka Homban (Mual) Toga Marbun di luat (tano) ni Toga Simamora, jadi suraon do Toga Marbun parjolo tu Bakkara asa Toga Simamora...

Mamompari ma Toga Marbun di Bakkara, jala torus tu sadari on hot do marga na tolu i di Bakkara dibagasan holong na masihaholongan dohot dame, jala punguan ni Toga Marbun tetap do berdiri sahat tu sadari on. Huta na pinungka parjolo pinauli ni ompunta Toga Marbun ima Parmonangan na di Bakkara, jala adong do bahalna toguon partukkoan digoari do i: TOGUAN NI MARBUN, jala on do ONAN TIGA BOLIT PARSAORAN na parjolo di Bakkara. Alai pinda ma i muse tu topi Tao Toba di bahen penjajah Belanda. Nuaeng nungga jong-jong Tugu ni Marbun di Toguan ni Marbun na di Bakkara, jala na manginganhon hita i sian marga BANJARNAHOR do, jala na manurihon on ma sada pomparanna.

Dung mangararat pomparan ni Marbun di Bakkara, borhat ma sian pomparan ni Lumban Batu tu Sipitu Huta Kecamatan Dolok Sanggul, torus ma muse pomparanna deba borhat tu negeri Marbun Sehun Meha Mungkur nuaeng (Sibongkare) Kecamatan Parlilitan na marmarga Marbun.

Borhat ma sian pomparan ni Banjarnahor tu:

- Parsingguran, Negeri Marbun Habinsaran nuaeng (deba sian i muse pinda tu negeri Marbun di Pakkat/Parlilitan na mamangke marga Marbun, Sehun, Meha, Mungkur).

- Onanganjang Sihikkit

- Ranggitgit

- Sigaol na di Simbolon Polu Samosir.

Borhat ma muse sian pomparan ni Lumban Gaol tu:

- Marbun Hasundutan (Aek na Uli)

- Pollung (Marbun Habinsaran)

- Sanggaran.

Tar songoni ma pangarerak ni perpindahan ni Marbun na tolu on sian Bakkara, alai sai adong do sipata sahali gus marga na tolu on mangingani sada daerah nangpe masitoropi nasida, alai totopdo diboanhon adat dohot uhum na jinalona sian ompuna/natorasna....

Jot-jot na jolo pagulut/marbadai na mardongan tubu di Toga Marbun... "Marbun santipul so donganon do i, samponggol so angkupon. Ndang tarbola nalak batang ni i", ninna marga-marga na leban do.

Sumber: 

BUKU TAROMBO Dan Catatan Peristiwa-Peristiwa Bersejarah dari Keturunan Ompu Saniangporhas Marbun Banjarnahor (Parbabidalu); A.A. Marbun (Guru Albinus), Dengan tuntunan Christoffel Marbun (Letkol Purn), Untuk Kalangan Sendiri.

Catatan: Lanjutan ni on ima tu pomparan ni ompunta Toga Sipoholo. Alai dang pola torushonon dison. Dang sai tortorhonon angka gondang ni dongan, annon gabe tubu anka perdebatan. 

Ompu Raja Ijolo, Martungkot Siala Gundi, 

Pingungka ni Ompunta Parjolo, Sihuthonon ni Hita Parpudi. 

Asa

Nasala Tapauli, Natading Taulahi.    

Horas ma hita saluhut.